((عازفة الوتر)) للشاعر د. علي مسلم عجمي
عالوتر عَزفِت لحن أحلامي
تترغِل على أوتار إيامي
هفهفِت أنغامها لحن الخلود
تتمايل جداديل قدامي
لامست أنغامها لحن الخلود
تتغلغل و كلما أناملها تجود
أوبرالي الصدى ما عندو حدود
أنغام عِشقِت وتر أنغامي
صوت الوتر مع صوت قلبي رفاق
مشتاق مفتون بنَغَـم مشتاق
خوابي نبيذ معتقين عتاق
نبيذ و لحن بيقوِّموا قيامي
لمين عم تشكي تباريح الهوى
خانك حبيبك طار مع نسمة هوا
بتعزفي عالوتر لحن الإشتياق
فراق الأحبة ما إلو علاج و دوا
بترسمي عالوتر أشواق و نهيد
و بترسليها شِعِر مع بيت القصيد
سِمْعِك البحر توشَّح بثوب السواد
و طائر النورس رَحَل أبعد من بعيد
عزفت صبيعِك عالوتر عزفة وداع
و عزف الوتر عا إصبعك عزفة خِداع
لحنين واحد نغم عِشق و عاطفة
و لحن هَمْ و غَم بيسبب صداع
عم تعزفي للبحر تا يرجِّع حبيب
و يحنِّنو من بعد ما أصبح غريب
وتر عم بيقول آخ من الفراق
و وتر تاني قالها قسمة و نصيب
من عاطفة و إحساس مصنوع الوتر
شرايين قلب متوَّجة بأرقى عِبَـر
منشان هيكي العزف متخطي الحدود
بتسمعوا بـإحساسها قلوب البشر
الشاعر د.علي مسلم عجمي
لبنان
ليست هناك تعليقات:
إرسال تعليق