علاء هشام
أنا السبب
في ليل قديم
كان الحزن لسا جديد
عامل نفسوا ضيف
أول سكين يلمس القلب
وأول المرة الجرح
مايكونش دواه الصبر
كان فيه الحزن خلاص
علم علي الوش والقلب
في ليل جديد
كان الحزن فيه
صاحب قديم
كان كل غيوم
السهر فيه مضمون
لكنوا مش مفهوم
بترزع القهوة
مرة زي الآيام
وسجايرك الرخيصة
زي ناس كتيرة
للأسف
تحاول تفتكر
إمتي وليه
إزاي ولإمتي
ركبك الهم
وبان وشك مهموم
ومين شايلك حمول
وليه بتحاسب علي مشاريب
مشربتهاش
وتمشي في سكة
مإخترتهاش
وتدفع تمن حياة
أقل مايقال عليها
معشتهاش
دي قصة وحدوته
مفصلها الزمن علي مقاسك
وبردو بتسئل ليه
أنا عملت إيه
وبتحب كل الناس
وبتكره نفسك
كل إلي خانك
برئ
كل إلي باعك
صديق
كل إلي قتلك
ملاك
وإنت شيطان
بداوي غلطاتك
بأغلاط تانية
وبتجرح سكاتك
بحوار مع ناس عايبة
إنت شيطان نفسك
ماوسوستش
غير لنفسك
بتبيع الجرح
لجرح تاني
وتقول أخف
وتدخل حروب
وتجري وري جروح
وتقول أنا السبب
أنا السبب
في وباء الكورونا
والسبب
في مجاعة السودان
وأنا السبب
في موت ريان
وأنا السبب
في تعويم الجنيه
وأنا لأمرتها
تبيع نفسها
لأمير الدرهم
والبترول
أنا لقتلت
جيفارا
وأنا لشنقت
صدام
وأنا السبب
أنا صاحب تخطيط
الحرب العالمية التالت
وأنا الشيطان الوحيد
إلي مايتحبسش في رمضان
وأنا لخليت الحب كلمة
وأنا إلي بعت بكلمة
أنا السبب
وأنا آخر شيطان
وأول شخص يحتار
إزاي يداوي جروح
بجروح معملهاش
وإزاي قهوة
تكفي علبة سجاير
أنا البسيط المعقد
أنا المعقد البسيط
انا السبب
في ألمي الشخصي
والألم المشترك
والألم العام
أنا السبب في كل حاجة
أنا السبب في ولا حاجة
ليست هناك تعليقات:
إرسال تعليق