ريان.
دق ناقوس الخطر
قام قلبي عليك يا ولدي إنفطر
قالوا دا عمره في الدنيا إتحسب واتسطر
ناديت بعلو صوت
يا ولاد قلب ملاك عليل وإتحظر
دق ناقوس الحياه
وعلي الشفاه دعوات ملايين
يا رب نجي ريان القمر
يارب إجعل الجب رفيق
وان ما كان يبقي طريق للجنه
دا صاحب الامانه هو إللي أمر
وعيونا سهرانين مفنجله
ليله حالكه منوراها الملايكه
ومنظرين فرج قريب ولو لمحة خبر
قلوب كل الأحبه إتجمعت
إتلمعت إتلوعت
أه يا ولدي قلبي عليك إنفطر
عدينا الثواني والساعات
إللي قال حي وإللي قال مات
وما كان في إيدي يا إبني إلا السكات
وتمر الدقايق حزينه
خطوه بخطوه لعينه
والجب فرحان بقلبه
بس حزين إن ريان في حضنه مات
قلبت الجرايد وانا بقول يا رب
يرحمه ويصبر أهله
ويبقي رصيد يخفف عنا الحساب
يارب عفوك ويا قلب صبرك
بكره تقابل وجوه
إللي ما ت علي الرصيف
واللي ما ت علشان رغيف
واللي مات علشان شريف
واللي مات علشان نضيف
وادي ريان النهارده
مات علشان في البير إتردم
مش هي دي الشهاده
مش هي دي السياده
واحد يفحت بير
ويسيبه كدا أصل ما فيش ميه زياده
أنا يا ريان من بعيد
بس والله قلبي عليك إنفطر
مع السلامه يا حبيبي
روح الجنه وخد بإيدي
والله جفت دمعونا من وريدي
وان كان يرضيك يا ربي
أمرك يا سيدي
دق ناقوس الخطر
قام قلبي عليك يا ولدي إنفطر
عبد الفتاح عبد الرحمن والي
ليست هناك تعليقات:
إرسال تعليق