همسات و أنغام … للشاعر د. علي مسلم عجمي
------------------
ما بدي الشمس تطلع من خِباها
و لا نجوم السما يسطع بَـهَـاها
انا اللي شفتها و قلبي عشقها
الشمس تاخذ ضِياها من ضِياها
الدكتور لما عن ال فيي إسألو
و آخذ ( روشتة ) تا الدوا إستعملو
عالصيدلية بس فوت و شوفها
بشفى عند ما شوف هالوجه الحلو
رسمتك بحرف و لون مانو أبجدي
و لونتك بلون الخلود السرمدي
حتّى سلاطين الرسم و المبدعين
مع كل حرف و لون منك تبتدي
سبحان الله بالخليقة كمّلك
ما ابدعك ..ما انعمك ..ما أجملك
الله ب6 أيام كونه صَوّرو
و باليوم السابع صَوَّرك وحدك إلك
بالمدرسة و الجامعة عالتنتنا
كتبتلها بنور القمر و الميجنا
تلاتة اللي حبوكي المراحل كلها
الأول أنا..التاني أنا..التالت أنا
مش بحاجة للعطر تتعطري
و لا تعملي مكياج أو تتسشوري
كلما كبرتي و زاد عمرك بالسنين
بيزيد فيكي الحلا كلما تكبري
إنتي الحلا إنتي العشِق و العاطفة
شعاع عينيكي ما عمرو بينطفي
لولا مرقتي بس لحظة بالنهار
منك الشمس بتنكسف و بتختفي
عشقتها و العِشق إحساسي لقط
حب جارف بالقلب حل و سقط
مشتاقلها ...كل يللي بشوفها
بس 6 ايام بالجمعة فقط
الشاعر ..د. علي مسلم عجمي
لبنان
ليست هناك تعليقات:
إرسال تعليق