حياه جديده.
عبدالله رجب ابوعدنان
لما الواحد يقرب ع الخمسين
يحس بالبرد و الأنين
وتظهر مقدمات
للشيبة علامات
وطول الوقت سكات
ف عز الفرح تلاقيه حزين
يعيد حساباته
ويخاف زلاته
وتكتر آهاته
وصوابع تنمل
لكن لازم يكمل
مشوار العمر بدون خلل
حتى لو صابه ملل
يدور على حاجه تفرحه
ذكرى قديمه وشوق وحنين
حياه جديده
أوقات سعيده
واوقات كتير رتيبه
وكله والعيبه
لكن الهيبه
بتكون ف عقل رزين
احساس غريب
ولما يتباعد الحبيب
مع الوجع والشكوى
تقوم تفتش عن طبيب
وما تلاقي دوا
غير عند الناس الطيبين
والشعر الأبيض يتسحب
وتبدأ ف خطوتك تحبحب
محتاج مواسيه وحد عليك يطبطب
وتسال نفسك
مين لسه بيحبك
ومين ف الصورة جنبك
ومين لسه باقي من المحبين
ويا ترى حد يشاركني إحساسي
ولا انا لنفسي بواسي
وليه ف لحظات كتير بآسي
واقعد أعيد ف شريط الذكريات
يمكن الاقي بجد مبررات
لجل ما اقف على رجلي
وارجع شباب حتى لو لساعتين
ليست هناك تعليقات:
إرسال تعليق