سامح تربح
نسى الماضي ؤ ما تبكي على ليام لي فاتو
عيش ليوم و نسى البارح الساعة دوارة تحسب للقلب في دقاتو
نسى الماضي ؤ تعلم من الغلطات لي فاتو
نسى العثرات ؤ جْراح القلب لي دْماتو
لي خَلاّ القبر يَجْبر ؤ لي تخطاتو الموت يا سعداتو
نسى الدغينة ؤ ما تحافي
لي جاك بالشر لقاه بالخير
تهرس شوكاتو
سامح ؤ تفكر مول الخير و لا تنكر
السوايع بدالة و الزمان دوار عارف كيف يصفي حساباتو
الصابر ليه الله و لي ما صبر يَنْضَرْ
يا ويل من في الحرب عاش حياتو
لي بْغاك بغيه و لي جفاك معاه ما تخسر
بغا يمشي الله يهنيه الوقت لي جابتو ليك ما خَلَّاتو
المحبة من الله تجي بالخاطر ؤ العداوة من الشيطان همو يزعزع راحة الخواطر
سامح و صافح سباب الشر كافر
ياويل من عَمَّرْ بيه اوقاتو
ساعة من الأفراح ترد الروح باش ينفع النواح و الدمعات إلا طاحو
النار بالنار تزيد تزهر تحرق يابس و خظر
الشر بالشر ما ينصف شحال من مظلوم مع ظالم سَوَّاتو
الظالم ماهو شاطر ؤ المظلوم ما هو خاسر و المسامح يربح الأجر
بادر و ما تْوَخَّرْ الموت يغدر شحال من واحد على غفلة جاتو
خلان عبد الكريم
ليست هناك تعليقات:
إرسال تعليق