زجل
دجل
بقلم شريف شحاته مصر
زجال وبيقرا فى الكف لو عقلك تعبان أو خف
يكتب لك ورقة تتلف بتصونك والإسم حجاب
أعالج بحبوب وعطارة ومباخر جامدة وجبارة
لا حتندم على أى خسارة نباتات ممتازة وأعشاب
لو شايف نفسك زهقان مش قابل عيشتك طهقان
بيبيعلك محلول روقان والرزق حيفتح أبواب
لو عايش مع ست كئيبة عايشة كأنها فى زريبة
جوز هند مطحون فى زبيبة ترجعلك ست الأحباب
من غير أسباب كدة مخنوق وصداع براسك من فوق يسقيك مسحوق منه تفوق يومين ونشوف ألمك طاب
لو عايز ترجع لشبابك وحبيبتك تشتاق فى غيابك
أو حد عزيز فر وسابك معايا علاج ينهى عذاب
معايا مية كتير طاهرة مع محلول ورد مع زهرة
تشفيك من الغل والقهرة تكشف لك قصد الكداب
علومنا بركة وأحوال وكلامنا حكمة بتتقال
وراثينها أعمام وأخوال مش علم مكتوب فى كتاب
بس انت اكرمنى بأموالك ولا تقلق من سوء أحوالك ما تلاقى هم تقيل جالك وما تسأل عن أى أسباب.
ليست هناك تعليقات:
إرسال تعليق