أنا الطيب
...........
أنا المطحون
أنا الطيب
لا خانك يوم ولا فرط
أنا إللي شايل فوق كتافه
همك
مربوط ف ساقية
مش بتدور
ويدور
لما داخ
وقف ياخذ نفسه
ليه ينام كل ليلة حزين مهموم
عشان شريف
لا بيسرق ولا بيتسول
يصحى الفجر يتتعطر بترابك ويتيمم
يصلي في محرابك ويتركع
لا عمره قال اه ولا أتوجع
شاكر وحامد ربه
صابر وراضي
باللي ترضي بيه
حني عليه شوية
ومدبحيش جواه حلمه
مدي إليه الأيد
ولمي من جواه حزنه
إبنه شهيدك
إللى بيدافع عنك
طول السنين
أنا المطحون
أنا الموجوع
أبني فيك كل يوم وأعمر
أدوس ع الصعب
أشيل سلاحي
ومهما طال الليل عليك
أجري
وأعبر
أغنى
أجبلك نهار
مفرود بطول البلاد
زي نيلك
وأولاد بيرسموا على الحيطان وشك
قمر وشجر ونيل بيجري
وبطل مصري
رغم إنه تعبان مهموم
مرضيش ليك بالهوان
ماهنش عليه تباتي مكسورة حزينة
تمرد
وعمل زلزال هز العالم من حواليك
ورجعلك حقك
بيضحكلك
بيرسم البسمة على وشك
ووجوه الولاد
وراسم لك
بأيديه الاثنين
علامة
الأنتصار
...............
بقلم // جمعه عبد المنعم يونس //
30 / 6 / 2018
مصر العربية
ليست هناك تعليقات:
إرسال تعليق