الطفولة و الطفل. للشاعر د. علي مسلم عجمي
الغصن الطري عالشجر لا ما تهملو
بيكون متل الطفل بعدو بأولو
الغصن بدو من الرعاية إهتمام
و الطفل بدو من الحنان تدللو
الطفل عنوان البراءة بشكل عام
الحور عكفوف الطهارة بتحملو
لا تعاملوا الأطفال سادة يا كِرام
بالعنف و القسوة و هموم تحَمِّلو
و لا ترغموا الأطفال عالشغل الحرام
و بالشوارع يشحذوا أو يعملوا
عرش الطفولة لا توطوله المقام
تاج البراءة من علوه تنزلو
بين الطفولة و الطفل في إنسجام
بألعاب لسنين الطفولة ترحلو
خلف الفراشة الركض و طيور الحمام
نط و قفز أطفال عم يتغازلوا
بيرددوا شو بيسمعوا أيا كلام
تقليد متل الببغا و بيترغلوا
لا تيتموا الأطفال حِجِّة إنتقام
الطفل مين دون أب مين بيكفلو
بإسم الطفولة بإسم وردات الخزام
بإسم الطفولة .الطفل لا ما تبهدلوا
بالبرد ما في للدفا عندو حرام
و بالشتا ما في سقف حتّى يظللو
و عالرصيف الطفل مع فَقرُه ينام
فراشو الأرض و السما لحافو بأكملو
بيهتز عرش السما و عالأرض الأنام
دمعة طفل عالأرض لما تنزلو
بسمة طفل بين البشر حب و سلام
و تاج البراءة مخصص بيبقى إلو
الشاعر… د.علي مسلم عجمي
لبنان
ليست هناك تعليقات:
إرسال تعليق