كلمات شاعر بنى هاشم
الشاعر صبرى عبد الواحد الحساني
وصايا صبرى
هياجيلك لكن فى ميعاده
رزقك لو كان نصيبك
وممكن غالى عليك
فى وقت الشدة يسيبك
والضربة ممكن تاجيلك
من اللى فاكره حبيبك
والغريب عنك عمره
فى ضهرك يوم يغيبك
ولو كان فيك عيوب
يدارى عن الناس عيبك
المحبة مش بالقرابة
ولا خالك ولا عمك ولا قريبك
صاحبك يفديك بروحه
مش يلقاك غريق ويسيبك
ونسيبك زى ولدك
لو فيه عيب هيعيبك
وصايا صبرى
نصيبك فى الميعاد هياجيلك
عليه ما تستعجلشى
وإن راح منك حبيب
عليه ما تزعلشى
وإن عملت خير فى مكانه
علي اللى عملته ما تندمشى
وإن مشيت فى طريق الرجوله
كمل فيه وما ترجعشى
وإن صاحب الحكاية ما حكالكش
عن أصل الحكاية ما تسألشى
وإن ما حدش وجهلك سؤال
إجابة على السؤال ما تجاوبشى
وإن كنت وسط النار
بعدوك ما تستنجدشى
وإن صاحبك فى يوم سابك
عليه تانى ما تندهشى
وإن عدوك جاته أذيه
فى آذيته ما تفرحشى
وحب لغيرك ما تحب لنفسك
الدنيا يا ولدى ما تستاهلشى
شاعر بنى هاشم/, صبرى عبد الواحد الحساني
ليست هناك تعليقات:
إرسال تعليق