** قصيدة/ بوليكا*
إلصورة الكاملة ببرائتها..
بتنادى بكونها على الحاسدين
إلصورة تقولك كام معنى
لو شوفنا حيرتها هتوجعنا
أيام بنعيشها وبنعافر
والجوع جوانا لكن كافر
والكدر المقصود مش باين
الكدر الحالى مهوش محسوس
والوضع الراهن مش ملموس
الضوء جوانا بقى معتم
لا مش معكوس
مكسور جوانا اصدق إنسان
والخير حوالينا فى كل مكان
إنسان هربان م البنى أدمين
أفعالهم شين ..
جواهم غل وحقد مكين
والصورة الظاهرة دى بوليكا
وهياكل زى الانتيكا
بتفرج على جوا قلوبهم
محتاج كلوركس وأستيكة
تتنضف من كل الصبغة
إسود ورمادى ولون ازرق
والله دى أصعب م النيلة
بحلم بقلوب صافية نبيلة
والكادر يكون واضح وجميل
وأشوف مساحات خضرة وبيضا
جوا قلوبنا كدة وسع النيل
✍️أميرة_مهران
ليست هناك تعليقات:
إرسال تعليق