(قهوة و قلم) ..للشاعر الدكتور علي مسلم عجمي
-------------------
جَهـزت قهوة بْـهَالْها و عندي القلم
منشان اكتب في حياتي شو ألم
مش بس ركوة شربت.قهوة عالمزاج
و القلم بعدو سطر واحد ما نظم
جَمَّعت أفكاري و قلت يا عقل حاج
تفكير عن شو تكتب اختار الأهم
القهوة ما زادتني تروِّي و إبتهاج
عا كل جرح المضي زادتني ألم
قالوا القهوة في مرارتها حَلا
بينها و بين القلم في إلفة و صِـلا
البن جوات القلم عامل مداد
و حسب وضع الشخص صفحاتو مَلا
مر و حلو الحالين فيها إجتهاد
و القلم حَدّد منهجو ومن و إلى
مع كل رشفة بن ركَّزها و أجاد
انكتبت خواطر أو شِعر متلا فلا
عن مين بدو يكتب و حالو كئيب
عن طفولة أو شبابو أو مشيب
عن حُب أيام الصبا و الولدني
عن غدر عاشو من غريب و من قريب
عن حضارة زايفة و ما ممدني
عن خيانة و البطل فيها حبيب
عن أم ثكلى و الفقر صوبا دِني
عن طفل مفطوم الرضاعة و الحليب
عن شخص أحلامو و أمالو مسودني
عن وطن بدو مواطنية تستجيب
عن كل شي حاصل و صاير بالدني
رح يكتب و فجان قهوة و القلم
من الصبح حتى الشمس ترحل للمغيب
الشاعر د. علي مسلم عجمي
لبنان
ليست هناك تعليقات:
إرسال تعليق