ماتخافوش
********
ماتخافوش على القصيده مني
هتقولوا قصيده حزينه
وإنى ببكى على صدرها القلم
وإنى برسم على الورق جرح وندم
ماتخافوش
هتقولوا لي مالك؟
هشرح لكم ومن غير قلق
مش عارفه ليه حاسه
إني مشدوده من ضهري بحبل قصير
بيبيعني الكل وأشتري نفسي
باللي باقي مني
وألم بعضي ببعضي
مابحبش ألوم أي حد ظلمني
بسكت ايوه بسكت
وسكاتي تاعبني
وعقلي جوه راسي مش حاببني
رافض إستسلامي بيشتكيني لزماني
رافض سكوتي ومش قابل كلامي
شايفهم بيفرحوا لما يشوفوني بحزن
بياخدوا فرحهم من جرحي
عقلي قلبه على قلبي
ساعات يقولي كملي
وساعات يسيبني أحتار
قصده إني أختار؟
كتير بلاقيني مخنوقه
وحاسه كإنى لابسه مقاس مش على قدي
جوايا بركان غضب
وزعلانه من نفسي وعلى نفسي
ساعات كتير بأدبني
وساعات عايزه أغيرني
عايزه ارسمني من جديد
وأغير دمى إللى أتحرق
عايزه ارسم طريق أمشيه
وأكون مش خايفه
ولا أندم ولا أقول تاني لنفسي أنا أسفه
عايزه أحضني وأصبرني وأضحكني
وأنساني لما كنت زمان
مغمومه ومهمومه وقلقانه وتعبانه
يمكن أكون عايزه أغيرني؟
عايزه أكتب قصيده بشكل جديد
أوصف نفسى فرحانه
وأنسى إني مجروحه
ياشوك الورد
ياشوك الورد ماتخافش على قصيدتي
وهات لي ورده فرحانه
وكام غنوه أسمعها أنا وقصيدتي
بقلمى
عبير محمد
ليست هناك تعليقات:
إرسال تعليق