( بين العقل و القلب) للشاعر د. علي مسلم عجمي
---------------
بين العقل و القلب ما في إتفاق
في خيانة و عِشق في صِدق و نِفاق
و بمجتمع ما في تآخي و لا وِفاق
صعبة تمَيِّز مين نام و مين فاق
بين الخيانة و الوفا ان أصبح غرام
هيك العقل و القلب بيصيروا رفاق
بين العقل و القلب أكتب يا زمن
في رِحلة الإنسان إنت المؤتمن
كم في مظلوم بالقبر اندفن
و كم في بالحب عاشق و انطعن
أكتب بجرأة بعرفك إنك جريء
و أكشف الأسرار كلها للعلن
العقل قاضي للفصاحة و للسان
و القلب قاضي للعواطف و الحنان
و بين الفصاحة و العواطف إتِّزان
حكمة و بلاغة في لها شرع و بيان
لا تحط عقلك خلف قلبك تا تصير
لعبة بإيدين البشر طول الزمان
العقل لما يموت بيموت الكلام
و بالوعي و الإدراك ما في إلتزام
بالرغم إنو القلب ينبض عالدوام
و مع كل نبضة بتزهر ورود الخزام
لكن إذا مات القلب ما في حياة
و عالعقل و الإنسان بالدنيا السلام
بالعقل ممكن عبقري تطلع أكيد
و قصور من عِلِم و بلاغة رح تشيد
عقلك براسك بالضروري تستفيد
و بالعلم تطلع نابغ و قائد رشيد
و لما ملاك الموت في سهمو يصيد
صاحب العقل.الناس تعمل لو نشيد
لكن قتيل الحب بالقلب الحنون
بإسم العشق و الحب بيقولوا شهيد
لما العقل و القلب يجتمعوا سوى
بإنسان . ما بيزعزعوا جنون الهوا
و مهما بنيران الهوى القلب انكوى
العقل جنبو رح يوصللو الدوا
و عالعقل لولا استأسدت كل القوى
القلب بيدللو عأفضل محتوى
و هيك العقل و القلب نعمة كاملة
لولا اجتمعوا سوى بأعلا مستوى
الشاعر د. علي مسلم عجمي
لبنان
ليست هناك تعليقات:
إرسال تعليق