توريطة ،،،
ليه فاكرة الهوى ليكي توريطة
ع الشوق والميل عاملة حويطة
ياللي انتي سكنتي الروح والعين
ويا ساحبة القلب ف براويطة
الهوى مش عقدة وبشنيطة
والحسبة معاه سهلة بسيطة
سيب قلبك لو وداك على فين
إحساسه مسار ليك وخريطة
قلبك دقته دقة كيوتة
تعزف للهوى من غير نوتة
ليه تسيبه يعيش وحداني حزين
علشان أوهام فيك مكبوتة
ده بيترجاك تفرِج عنه
ده خلاص دنيته هتروح منه
مغلوب على أمره معاك مسكين
تبقى انت عليه وكمان زمنه
ليه تعانده ودمع عينيه عيطة
وتسيب فيه النار والعة شطيطة
وان سألك مرة إن كنت تلين
رده اضرب راسك ف الحيطة
الحب ده ليك سندك ضهرك
هيحاجي عليك يمحي في قهرك
لو فاتك تحيا بقلب عليل
ترجع تندم تشكي لدهرك
يا حبيبي انا جاي معاك دوغري
رايدك وشاريك انا من صغري
افتح للهوى قلبك يا جميل
على بابك وقفته من بدري
ما تقولشي ده وهم وتوريطة
ولا قيد ع الروح ولا تربيطة
أوله أحلام وسهر ف الليل
آخرته شمعاية وزغروتة
توريطة
بقلمي/ خالد جمال ١٣/٨/٢٠٢٦
ليست هناك تعليقات:
إرسال تعليق